أنا وإبنى
ماما..أنا زعلان إن إحنا هندخل النار
مين قالك يا حبيبى إن إحنا هندخل النار
....الشيخ
لية يا حمزة عملنا إية؟
عشان بنسمع أغانى وإنتى مش لابسة نقاب
لأ يا حبيبى ربنا بيدخل الناس النار عشان حاجات غير كدة خالص
يعنى إية.. زى إية؟
زى الكدب والسرقة والقتل والغش والشرك باللة
طيب إية أكتر حاجة من دول بتزعل ربنا؟
مش عارفة بالظبط يا حمزة إية أكتر حاجة...بس بيتهيألى كدة إن الكدب
أكتر حاجة ممكن تزعل ربنا
لية يا ماما؟
عشان الناس احياناً بتكدب من غير مبرر وحتى لو فية مبرر دا برضة مش مبرر اللى بيكدب دة بيختار ويتعمد إنة يأذى اللى بيكدب علية وبيتعمد يضللة والتعمد دة فى حد ذاتة دليل على فساد القلب وسوء النية
يعنى مش هندخل النار يا ماما؟
إن شاء اللة ياحبيبى مش هتدخل النار طول ما انتة بتحافظ على طاعة ربنا ومش بتعمل الحاجات اللى تزعلة
وانتى يا ماما؟
أنا.. انا معرفش يا حمزة انا هدخل الجنة ولا لأ
"حزن وخوف فى عيون ابنى اعقبتها فترة صمت ومراجعة لنفسى"
..عارف يا حمزة أنا إن شاء اللة هدخل الجنة عارف ليةلأنى مش باعمل اى حاجة تزعل ربنا بقصدى ولما باغلط باستغفر ربنا ومش بكرر الغلط دا تانى
"معانقة جامدة من حمزة لماما"
كويس يا ماما عشان انا مش عاور أبقى كمان فى الجنة لوحدى
أنا لوحدى
للأمل ..ولكنة يبقى سراباً..عن الدنيا أتحدث
"من أوراق إمرأة تحاول ألا تكون بائسة"
2010
.jpg)
ليه بس البؤس
ReplyDeleteحد يبقى عنده القمر ده و يبقى بائس
يظهر بقى انى عديتك من الغم اللى عندى
اولادى برضه بيفضلوا يسألونى فى موضوع الجنه و النار كتير و باحاول على قد ما اقدر اوصلهم المعلومه مبسطه و سهله
ربنا معاكى و معانا
و ربنا ما يحرمكوا من بعض يا قمره
امووووووووووه
حبيبتي مامت حمزة بيه
ReplyDeleteان شاء الله نكون كلنا من اهل الجنة
ده الصبر لوحده سبب
وما يلقاها إلا الذين صبروا وما يلقاها إلا ذو حظ عظيم
صدق الله العظيم
انتي بس احضني ميزو قوي
واصبري على تربيته بطولك
ومتشتكيش مما كتبه الله عليكي
وعيشي وسيبيها على الله
ان شاء الله العوض جاي في حمزة وكل فرحة في علم الغيب
اصل الدنيا ساعات كده بتحلو بكرم الله
وربنا ساعات بيجيب جوائز صبر في الدنيا
وكتير قوي منها متحوش للآخرة ان شاء الله
بوسة ليكي وبوسة لميزو ربنا يحميه
بجد بوست رائع جدا وربنا يخليهولك ويحقق حلمكوا بدخول الجنه واياكو
ReplyDeleteاللهم امين
تقبلي مروري وتحياتي
حبيبتى ستيتة
ReplyDeleteمش بشتكى واللة وصابرة ومبسوطة وحمزة مالى دنيتى كلهابس إنتى عارفة هى كدة بتقفل أحياناً بس ربك موجود بيشيل عنا كتير والواحد طول الوقت محتاج حد يكلمة ويتواصل معاةعشان بيكون تاية ومش عارف هو صح ولا غلط
تقبلى تحياتى وقبلاتى وسلام موزة
حبيبتى صيدلانية
ReplyDeleteمش بؤس واللة ولا حاجة هو زى ما تقولى كدة شوية لخبطة محتاجة لشوية فضفضة والحمد للة ان الواحد بيلاقى ناس حلوة كدة زيك يتواصل معاهم
بوسة للولاد وتحياتى وحبى ليكى يا دكتور
عزيزتى سونى
ReplyDeleteشكرا على تعليقك الحلو ويارب جميعا يكون مكاننا هو الجنة
نورتينى يا قمر
بس اتقبل مرورك دا إية أنا اللى بييجى عندى مش بيطلع أبدااااا حالا سيادتك هتكونى على "
الريدر"عافية بأة
حبيبتي مامت ميزو اللذيذو
ReplyDeleteبيتهيالي سؤالك اذا كنتي صح ولا غلط دا مجرد سؤال مش مستني اجابة لان الاجابة واضحة اوي.. ازاي نحكم على كل اللي يخالفنا انه هيدخل النار؟ يعني عشان انا محجبة مش منتقبة اللي لابسة نقاب ليه تحكم عليا اني اقل دينيا وتقرر من نفسها كدة اني هدخل النار؟ انا بحمد ربنا ان احنا لينا اله واحد متنزه عن صفات البشر لان لو كانوا اكتر من اله او فيهم اله بشري كنا ضعنا.. يا رب ربنا يعاملنا برحمته مش بعدله.. اوعي تستسلمي لفكر القطيع اللي هيودينا ف داهية ويعلم ولادنا الارهاب بجد.. فهمي ابنك طول الوقت على حسب سنه ف كل لحظة ازاي ان ربنا رحيم وازاي انه هو سبحانه وتعالى بس اللي بيحاسبنا ومحدش له الحق دا .. انا واثقة ف عقلك وذكائك ومتاكدة انك هتقدري توصلي بحمزة لبر الامان.. ربنا يباركلك فيه وتشوفيه احسن مما تتمني
حبيبتى مامت عمور الامور
ReplyDeleteالمشكلة مش فى ابنى ولا فياالمشكلة فى الدخلاء اللى بيقتحموا دماغ العيال ويأثروا عليهم ..بس اللة المستعان شكراً على دعائك لحمزة وربنا يبارك فى عمر وتفرحى بية
قبلاتى وتحياتى
ربنا يباركلك في حمزة...
ReplyDeleteويبعد عن دماغه الافكار اياها بتاعت انت هتدخل الجنة علشان بتسمع كلامي.. وانت هتدخل النار علشان مش عجبك ال بقولو...
وبتهيألي كفاية انك تربي ولد في طاعة ربنا.... علشان تبقي واثقة من رحمة ربنا... طالما مبتغضبيهووش...
زيارة اولي وهتتكرر ان شاء الله....
ps: احنا تقريبا بلديات
تحياتي
يا أهلا يا ابو على يا بلدياتى
ReplyDeleteالحمد للة حمزة راجل محترم يعجبك ودماغة هايلة وربنا يقوينا جميعاً
نورتنى وفى انتظار زيارات متكررة(بلديات ولازم نطل على بعضينا)
نورتنى
حبيبتى ازيك
ReplyDeleteوحشانى جدا جدا
وميرسي اوى اوى لسؤالك عليا
الظاهر ان كل الاطفال شاغلهم اوى موضوع الجنة والنار دا
بناتى على طول بيسألونى عنه واسئلة اكتر متعلقة بايه موجود في الجنة وايه موجود في النار
ربنا يخلي لك حمزة يارب
وواضح جدا انه عسول زى مامته
وتأكدى ان الدنيا حلوة بحمزة ان شاء الله
ويارب نكون كلنا من اهل الجنة باذن الله
اية النور الجامد جدا دة...لا شكر على واجب ياست الكل انا فعلا افتقتدك ويارب يستجيب لدعائك ونكون كلنا من اهل الجنة بوساات كتيير ليكى وللبنات
ReplyDeleteنورتىنى
تعرفى ردك عليه كان بجد رائع
ReplyDeleteلو فكرتى فى كل حاجه غلط هتلاقى بدايتها الكدب
شوفى اى حاجه غلط كده هتلاقى لازم الواحد يكدب علشان يعملها
اللسان هو الاساس
فى حديث عن الرسول صلى الله عليه وسلم اعتقد انك تقدرى تقوليه لابنك
انا معرفش نص الحديث بس تقدرى تبحثى عنه هتلاقيه
الحديث فيما معناه
ان الرسول صلى الله عليه وسلم قال
من ضمن لى ما بين فكيه ( اللى هو اللسان ) وما بين فخذيه ... اضمن له الجنه
والله اعلم
معلش فى طلب صغنطوط
ReplyDeleteال الحروف الاملائيه ... اللى هيا الكلمه التاكيديه اعتقد انها ملهاش لازمه ولا انتى عملالنا امتحان لغه :))
اعتقد هتبقى افضل من غيرها
شكرا ليكى
عايش ولكن
ReplyDeleteاشكر تشريفك لأول مرة وان شاء اللة متكونش اخر مرة بالنسبة لردى على ابنى أنا فعلاً بعتبر الكدب هو الآفة الكبرى فى حياتنا باعتبرة اكبر ذنب ممكن يرتكبة الانسان لانة بيكدب بمزاجة وبالتالى بيأذى الناس بمزاجة
بالنسبة لموضوع الكلمات التأكيدية والحروف الأملائية واللة مش عاملة امتحان ولا حاجة انا حتى مش فاهمة انت قصدك اية عرفنى بس انهى كلمات وانا مكتبهاش تانى
تحياتى